Gwneud Enwebiad

Cymhwystra

Rhan 1: Meini prawf cymhwystra ar gyfer yr enwebydd

Ni all y grŵp enwebu ei hun, mae’n rhaid iddo gael ei enwebu gan rywun arall.

Mae’n rhaid bod y canlynol yn wir am yr enwebydd:

mae’n aelod o’r cyhoedd sydd â gwybodaeth dda am waith y grŵp (megis buddiolwr neu gefnogwr hirdymor)

mae’n gallu darparu dau lythyr o gefnogaeth ar wahân gan ddau berson gwahanol sy’n adnabod y grŵp yn dda

Ni all yr enwebydd fod yn un o’r canlynol:

yn wirfoddolwr, cyflogai neu’n ymddiriedolwr i’r grŵp, neu’n ymwneud mewn unrhyw ffordd â rhedeg y sefydliad

Mae angen i ni sicrhau bod yr enwebwyr yn annibynnol, ac ni all aelodau’r grŵp enwebu eu hunain. Mae hyn yn bwysig iawn, gan fod Gwobr y Brenin am Wasanaeth Gwirfoddol yn anrhydedd cenedlaethol.

Rhan 2: Meini prawf cymhwystra ar gyfer y grŵp

Mae gwobrau Gwobr y Brenin am Wasanaeth Gwirfoddol wedi’u hanelu at grwpiau sy’n cael eu harwain gan wirfoddolwyr ac sy’n darparu budd i gymunedau lleol.

Mae’n rhaid i’r canlynol fod yn wir:

mae’r grŵp wedi’i ffurfio o dri o bobl neu fwy

mae’r grŵp wedi’i leoli yn y DU, Ynysoedd y Sianel neu Ynys Manaw

mae’r grŵp wedi bod yn gweithredu am o leiaf tair blynedd cyn yr enwebiad

mae gan fwy na hanner y gwirfoddolwyr yn y grŵp yr hawl i breswylio yn y DU

mae’r grŵp yn cael ei arwain gan wirfoddolwyr, nid gan staff cyflogedig; dylai dros hanner ei aelodau fod yn wirfoddolwyr

mae’r grŵp yn rhoi budd penodol ac uniongyrchol i’r gymuned leol

Ni all y grŵp fod:

wedi ei enwebu am Wobr y Brenin (neu Frenhines) am Wasanaeth Gwirfoddol* yn ystod y tair blynedd diwethaf

eisoes wedi ennill Gwobr y Brenin (neu Frenhines) am Wasanaeth Gwirfoddol*

yn gweithredu fel sefydliad cenedlaethol, gan fod Gwobr y Brenin (neu Frenhines) am Wasanaeth Gwirfoddol* wedi’i anelu at grwpiau gwirfoddol lleol

yn codi arian neu’n gwneud grantiau fel prif ffocws

wedi’i leoli o fewn, neu’n cefnogi gwasanaeth cyhoeddus, oni bai ei fod yn endid ar wahân i’r sefydliad gwasanaethau cyhoeddus

yn gweithredu er budd anifeiliaid yn unig, oni bai ei fod yn gallu dangos bod ei waith yn rhoi buddion eraill sylweddol i’r gymuned leol (er enghraifft, anifeiliaid anwes therapi)

*newidiodd Gwobr y Frenhines am Wasanaeth Gwirfoddol (QAVS) ei enwi i Wobr y Brenin am Wasanaeth Gwirfoddol (KAVS) yn 2023

Arweiniad Ychwanegol:

Budd lleol penodol ac uniongyrchol

Mae’n rhaid bod grwpiau yn darparu buddion uniongyrchol i gymuned trwy eu gwaith, er enghraifft, cefnogi pobl anabl yn uniongyrchol. Ystyrir bod grwpiau’n anghymwys pan mai
cefnogi un neu fwy o grwpiau eraill sy’n darparu’r buddion uniongyrchol hyn yw eu hunig bwrpas. Dyma pam mae sefydliadau codi arian a rhoi grantiau yn cael eu hepgor yn benodol
fel y rhestrir uchod.

Sylwer, efallai y caiff grwpiau sy’n codi arian eu hystyried os yw eu gweithgareddau’n cael effaith fuddiol sylweddol ar y gymuned ehangach y tu hwnt i godi arian (er enghraifft, trwy gynnal digwyddiad mawr neu ddarparu gwasanaeth lleol sylweddol).

Sefydliadau cenedlaethol

Gall grŵp gael ei enwebu os yw’n gangen o sefydliad rhanbarthol neu genedlaethol mwy o faint, neu’n gysylltiedig â’r fath sefydliad. Fodd bynnag, disgwylir ei fod wedi cychwyn a datblygu dull unigryw yn lleol ac yn gallu dangos lefel uchel o ymreolaeth a
hunanbenderfyniad (er enghraifft, grŵp sgowtiaid lleol).

Grwpiau sy’n cefnogi gwasanaeth cyhoeddus

Mae grwpiau sydd wedi’u lleoli o fewn, neu yn gefnogol i, wasanaeth cyhoeddus (megis ysbyty, heddlu neu ysgol) yn gymwys, ond bydd angen i chi allu dangos y canlynol:

bod y grŵp yn endid ar wahân i’r sefydliad statudol a’i bod yn glir ei fod o dan arweinyddiaeth gwirfoddolwyr, yn hytrach na’n dilyn cyfarwyddiadau gan staff sydd wedi’u cyflogi yn y sefydliad

grŵp gwirfoddol hirdymor sefydledig yw’r grŵp, sy’n endid unigryw yn ei rinwedd ei hun ac sydd â strwythur rheoli, yn hytrach na bod yn rhan o gynllun ehangach neu’n fenter wirfoddoli dan arweiniad ysgolion